27. nardaran hadisələrinə hüquqşünas aslan ismayılovun münasibəti

əziz həmvətənlərim, əziz nardaranlılar, baş verən son hadisələrlə bağlı sizə müraciət etmək qərarına gəldim. bu müraciət sizə olan hörmətimdən, düşdüyünüz mürəkkəb vəziyyətdən qaynaqlanır. sizləri həmişə haqqın, ədalətin tərəfində gördüyümdən əksər hallarda hakimiyyətin sizə qarşı qanunsuzluqlarını qınamışam və sizi müdafiə etmişəm. son hadisələr əminəm ki, sizin təsəvvür etdiyinizdən də mürəkkəb və azərbaycan dövlətçiliyi üçün təhlükəli olduğundan bəzi fikirlərimi bölüşürəm. bilirəm ki, bu günkü hakimiyyət xalqa dəyər vermir, apardığı siyasət əksər hallarda məmurların cibinə qulluq edir. məmurlar isə harınlaşıb və boğazlarına qədər korrupsiya bataqlığındadırlar. bununla belə, azərbaycan hamımızın vətənimizdir və onun təhlükəsizliyini qorumaq, qanunlarına tabe olmaq, hakimiyyətin yaxşı ya pis olmasından asılı olmayaraq, hamımızın borcudur. ətarfımızda baş verən son hadisələr, rusiya - türkiyə qarşıdurması çox təhlükəli məqam olduğundan xəbər verir və hamımız dövlətimizin təhlükəsizliyini düşünməliyik. bu gün azərbaycanı liviya, suriyaya döndərmək istəyən çox hiyləgər və təhlükəli qüvvələr var. ölkəmizdəki bu günkü durum məni də qane etmir və məhz buna görə bu günlərdə video çıxışla azərbaycan respublikası prezidentinə müraciət etdim. bu hakimiyyət mənim də haqqımı yeyib, peşəm olan vəkilliklə məşğul olmağı mənə qadağan edib, getdiyim idman zalına belə buraxmırlar, bu yaşımda din-in baş mütəşəkkil cinayətkarlıqla mübarizə idarəsinə apardılar, vurdular, təhqir etdilər, ölümlə təhdid etdilər. bununla belə, 4 dinc sakinin ölümünə acıdığım kimi, nardaran hadisələrində həlak olmuş, vəzifə borcunu yerinə yetirən polislərin də ölümünə acıyıram və uca allahdan hamısına rəhmət diləyirəm. belə hadisələr baş verməməlidir. istənilən narazılıq, etiraz dinc yolla həll olunmalıdır.
bilirəm bu məqamda bildirəcəyim iradlar xoşunuza gəlməyəcək, ancaq heç vaxt kiminsə xoşuna gəlmək üçün yox, insanlara fayda vermək üçün çalışmışam. əminəm ki, bu gün seçdiyiniz qarşıdurma yolu yalnışdır və bundan imtina etmək lazımdır, dövlətlə zor dilində danışmaq, onu hədələmək, onun qanunlarına hörmətsizlik etmək olmaz. baş verənləri təfsilatı ilə bilmirəm, bildiklərim sosial şəbəkədə yayılan məlumatlardandır. onları isə bir neçə gündür ürək ağrısı ilə izləyirəm. sosial şəbəkədə məktəblilərin çıxışları isə son nöqtə oldu. balalarımızı oxumaq lazım ikən, öz dövlətinə, pis də olsa hakimiyyətinə, nifrət hissi ilə böyütməməliyik. ümumiyyətlə bu gün onların həyatdan sevinməli olduqları yaşlarında o çıxışları etmələri, o cür davranmaları özü bir faciədir. onlar isə gördüklərinə uyğun hərəkət edirlər. görünən isə odur ki, bu gün nardaran qəsəbəsi sanki, azərbaycan ərazisi deyil, və orada azərbaycan qanunları işləmir. əlbəttə, bu birinci növbədə hakimiyyətin günahıdır, bəlkə elə hakimiyyətdə olanların bir çoxuna bu sərf edirdi ki, lazım olanda bizim qanımız hesabına öz çirkin niyyətlərini həyata keçirsinlər. hakimiyyəti müdafiə etmək fikrində deyiləm. axı bu hakimiyyət insanların etirazlarını bildirməsi üçün ümumi azərbaycan mitinqinə “məhsul” stadionunda keçirilən mitinqlərə icazə verdi. özüm də hər mitinqdə iştirak etdiyimdən əminliklə bildirirəm ki, həmin mitinqlərin keçirilməsinə heç bir maneçilik yox idi. həmin mitinqlərə ən çoxu 3-5 min insan gəlirdi. sonuncu mitinqə isə təxminən 500 insan gəlmişdi. özü də həmin mitinq qiymətlərin bahalaşması ilə bağlı idi. bu gün nardaranda yığışan insanlar, bu hadisələri bütün azərbaycana yaymaq istəyənlər o mitinqlərə gəlmədilər. bu gün nardaranda olan qətiyyətlilik, etirazlar həmin mitinlərdə olsaydı, sizin kimi digəriləri də orada etiraz səslərini ucaldsaydı, mitinqçilərin sayı 50-100 min olsaydı bu günkü özbaşnalıqlar, qanunsuzluqlar, korrupsiya halları olmazdı. bu gün nardaranda baş verənlər hakimiyyət nümayəndələrinin qəsəbəyə buraxılmaması, kommunal ödənişlərdən imtina edilməsi hakimiyyətə zor tətbiq etməyə qanuni əsas verir. ola bilsin hakimiyyət nardaranda keçirilən əməliyyatda qanunsuzluq etdi, səriştəsizlik göstərdi. ancaq nardaran sakinlərinin davranışını, sanki torpaqlarımızı erməni işğalından azad edirik kimi gördükləri hazırlıqları, dəmir parçaları, digər zor alətləri ilə silahlanmalarını qəbuledilməzdir. bu cür davranış hakimiyyətin içində və xaricdə olan bəzi aqressiv, ola bilsin təxribatçı qüvvələrin qan tökməsinə, ölkəmizi xaosa sürükləməsinə imkan verə bilər. bunu heç bir halda etmək olmaz. yaddan çıxartmaq olmaz ki, siyasi, ictimai qüvvələrdən fərqli olaraq hakimiyyət yeganə qüvvədir ki, ona qanunla zor tətbiq etmək haqqı verilib. buna yol vermək olmaz.
bir daha hamınızdan azərbaycan qanunlarına, hakimiyyətə hörmətlə yanaşmağı, ölkəmizdə baş verən özbaşnalıqlarla qanunda nəzərdə tutulmuş üsullarla mübarizə aparmağa çağırıram.