97. abş-da liderlik dərsində bir avropalı tələbə yoldaşımız vardı. xanım öz ölkəsində nazirliklərdən birində şöbə müdiri idi. dərsin formatı elə idi ki, hamı dərsdə iştirak etməli, danışmalı, müzakirələrdə iştirak etməli idi. bundan əlavə qrup işləri vardı ki, qrupun işinə töhfə verilməli idi.
xanım tələbə yoldaşımız ağzını yumub, heç nə demirdi. əvvəllər yumşaq şəkildə başqa tələbələr irad bildirdilər, yenə susdu. sonra qrup işində də heç nə etmədiyinə, sadəcə dayanıb baxdığına görə qrup yoldaşları professora şikayət etdilər. professor bir neçə dəfə danışdı, hər dəfədən sonra yenə xanım susurdu, dərsdə bütün qrup onu tənqid etsə də, daş kimi dayanmışdı.
növbəti dərsdə professor çox nəzakətlə "səninlə danışmaq alınmır, xahiş edirəm ki, auditoriyanı tərk edəsən və bu dərsə gəlməyəsən" dedi. xanım çantasını, laptopunu götürüb otaqdan çıxdı. növbəti dərs gəldi və bu davranışının izahını verdi.
dedi ki, öz işlədiyim qurumda elə adamlarla qarşılaşıram ki, onlarla bütün bildiyin nəzakətli yolları yoxlamışam, nəticə dəyişmir, öz bildiklərini edirlər. deyir fikirləşdim ki, bəlkə burada yeni bir üsul öyrənərəm, ona görə elə davrandım ki, görüm dünyanın tanınmış liderlik professorunun belə vəziyyətdə həll yolu nə olur? o da dözmədi, məni qrupdan çıxardı. deməli, başqa yol yox imiş doğrudan da, qayıdan kimi o əməkdaşları işdən çıxaracam (c) bəxtiyar hacıyev