3. ilk dəfə 1795-ci il 14 iyul tarixində rəsmi olaraq qəbul edilmiş Fransa dövlət himni. Adı "Marselyoza" ("La Marseillaise") olsa da, bu himn, əslində, bilinənin əksinə Marseldə deyil, Strazburqda *Ruje de Lil* (Rouget de Lisle) tərəfindən Böyük inqilab zamanı Avstriyaya müharibə elan edilməsindən sonra döyüşçüləri həvəsləndirmək məqsədilə yazılmış (6 bənd) və bəstələnmişdir. (Himnin sözlərində də xarici işğala və tiranlara qarşı mübarizəyə çağırışı eşitmək olar.) Bəstəkar özü ifasını "Reyn ordusu üçün hərbi marş" (chant de guerre pour l'armée du Rhin) adlandırmışdır. Himn ilk dəfə Strazburqda mayor Dietrichin evində səslənmiş və bəyənilmişdir.

Yaranma tarixinin Strazburq şəhəri ilə bağlı olmasına baxmayaraq, himnin "Marselyoza" adlanmasının səbəbi isə onun Parisdə ilk dəfə məhz Marsel şəhərindən olan könüllü dəstə tərəfindən ifa edilməsidir. Himni ilk dəfə 1792-ci ildə paytaxta doğru zəfər yürüyüşü edən bu qrupdan eşidən Paris əhalisi dərhal ifaya "La Marseillaise" adını verərək onu bu ad altında əbədiləşdirmişdir. Tarix boyu müxtəlif hökumətlər tərəfindən bir neçə dəfə qadağan olunan və ya əvəzlənən bu marş sonuncu dəfə 1958-ci ildə V Respublika tərəfindən rəsmi olaraq dövlət himni elan edilmişdir.

Kiçik qeyd: Nə vaxtsa Strazburq şəhərinə yolunuz düşərsə, Homme de Fer və Broqli meydanları arasında Mésange küçəsində yerləşən və himnin "doğulduğu" ev hesab edilən tarixi məkanı da ziyarət edə bilərsiniz.