1028. Etiraf edim ki, bəzən sırf dostlar arasında söhbətlərdən uzaq qalmamaq üçün, heç izləmədiyim bir film, oxumadığım bir kitab, heç bir anlayışım olmayan mövzu haqqında yalandan atıb-tuta bilirəm. Məktəb vaxtı yadımdadır, ən sevdiyim filmin nə olduğunu soruşanda godfather demişdim (ki, indi də elə ən sevdiyim filmdi, yalan demiş sayılmaram) halbuki, qram da anlayışım yox idi, xaç atasını oynayan aktyorun al paçino olduğunu zənn edirdim, o dərəcə. Amma " ay da o nə səhnəydi elə?", "aktyor yaradıbe" tərzində pafosla çıxışlar edirdim. Ən sevdiyin səhnə nədir? Soruşanda, "gədəni vururdulare bax o səhnə" demişdim (mafia filmidir, yəqin ki, kimsə vurulmalıdır). Vaxtılə lotr üçün də eynisini etmişdim.

Və yaxud hələ də game of thrones izləməməyimə baxmayaraq, "o nə zibil finalıydı elə?" Şəklində çoxbilmişlik edirəm, ancaq konseptin nə olması xaricində elə də bir anlayışım yoxdur. Qısası ordan burdan eşitdiyimi başqalarına satıram. Ola bilər ki, nə vaxtsa, dələduzluq maddəsi ilə məsuliyyətə cəlb olunaram, amma nə edim, mən də bu formada bir xəstəyəm.