4. Kitabın adı 1984 romanının adına bənzəyir. Araşdırdığım müddətdə yazıçının bu romandan təsirlənərək və ya məzmun yaxınlığından öz əsərinə də belə ad qoyması ilə bağlı məlumata rast gəlmədim. Kitabların bir-birinə yaxın məzmunda olduğunu düşünənlər də var, amma məncə 1q84-də siyasi görüşlər əsas xətt deyil. Daha çox dünyanı sevgi xilas edəcək mesajı verilib. Sadəcə olaraq hadisələr 1984-cü ildə cərəyan edir və əsərin əsas qəhrəmanlarından biri keçid etdiyi, qeyri adi hadisələrin yaşandığı dövrü 1q84 adlandırır. Əsərdə kommunizmlə bağlı görüşlərə yer verilib, lakin həmin cəmiyyət qısa müddət sonra dini bir topluluğu çevrilir. Yəni çox da dərinə gedilməyib, biraz din mövzusu üzərində dayanılıb. Əsas xətt isə uşaq vaxtından aralarında duyğusal bağ yaranmış iki insanın taleyinin necə birləşməsidir. Birləşməni təşkil edən isə mistik qüvvələr olan little people-dır. Kitabı oxuduqca insanı özünə çəkən reallıqdan qoparan aurası hiss olunur. Hekayəni 3 şəxsin dilindən dinləyirik. Bəzi oxucular təkrarlardan şikayətlənib, amma məni təkrarlar yormadı. Diqqətlə oxuduqda hər obrazın gözündən hekayəni görür, onların daxili aləmini daha yaxşı anlayırsan. Təkrarçılıq söz oyunu şəklində, və ya lap dərin psixoloji vəziyyətin izahı deyil, obrazların fərqli dünyalarının açılması ilə bağlıdır.
Murakamidən oxuduğum ilk kitab idi, bundan əvvəl hamı təriflədiyinə görə Norveç meşəsini də oxumağa çalışmışdım, amma ilk səhifələrdən maraqsız olduğunu düşünüb atmışdım. Başa düşdüyüm qədərilə açıq saçıqlıq yazıçının hər kitabında var. Bəlkə də müasir kütlə nəzərə alınaraq belə hissələr də kitaba daxil edilir.