209. Mental sağlamlığınla əlaqədar problemlərin var, əziz yeniyetmə bayquş. Hər kəs səni tərifləyir, bütün müəllimlərin "Səndən çox böyük gözləntilərimiz var" deyir. Bir tərəfdən düz deyirlər amma beyninin saat kimi işləməsi səni aldatmasın. 17 yaşında bu təriflərdən qürur duyursan. Duyacaqsan əlbəttə ki. Çünkü öküz kimi oxuyursan. Amma sən sağlam bir yeniyetmə deyilsən. Yaşıdlarının səndən uzaq durmasının tam olmasa da günahkarı sənsən. Girdiyin heç bir mühitdə insanlara uyğunlaşa bilmirsən. Tamamilə təksən və bunun fərqində deyilsən. Hər şeyi normal qarşılayırsan. Həyatdan zövq almırsan. Digər yeniyetmələrin hormonları qulağından fışqırarkən, çılğınlıqlar edərkən, aşiq olarkən sən proqramlanmış robot kimi hər gününü eyni keçirirsən. Uğurların bol olacaq. Ətrafdakıların deyimiylə "kəllə" olacaqsan amma bir gün onların hamısı burnundan gələcək. Nə uşaqlığını uşaq kimi yaşadın, nə də yeniyetməliyini yeniyetmə kimi yaşayırsan. Sənə pis xəbərim var. 6 il sonradan, gələcəkdən gələn bayquşdur səninlə danışan. Gəncliyini də gənc kimi yox yenə robot kimi keçirəcəksən. indi öyrəndiyinin ən az 50 qatını öyrənəcəksən. ixtisasın daxil olmaqla hər sahəyə əlindən gələn qədər hətta daha çox burnunu soxacaqsan. Amma yenə yalnız olacaqsan. Ən əsası da uğurlarının açarı olan beynin sayəsində işini, kariyera planlarının başını buraxıb öz qanına susayacaqsan. "Niyə?" deyə soruşursan yəqin. Çünki illərlə öz çəkdiyin mental əzabın fərqində olmadın. Mental çöküşün özünü iştahsızlıqla, yuxusuzluqla, zəhrimar yağan sifətinlə göstərəcək nə az nə çox düz 3 il boyunca. Bunlara rəğmən ərəb atı kimi o tərəf bu tərəfə qaçacaqsan hədəflərinə çatmaq üçün. Hədəflərinə çatacaqsan. Yenə ətrafdan təriflər gələcək. insanların həmişə səndən gözləntisi olacaq. Amma bu gün, hansı ki "gənc" bayquşun səninlə danışdığı gün artıq uzun müddətdir ki ağır bir diaqnoz səbəbilə ev həbsindədir. Düzü, bir yerlərə gedəcək nə həvəsim var nə də ki gücüm. Kimi kimdən qoruyurlar deyə soruşsan bayquşu bayquşdan qoruyurlar. Hər kəsin dediyinə görə seçdiyim yol çıxış yolu deyilmiş. Kaş beynimin içini açıb birinə göstərə bilsəm. Məni qorxudub çəkindirməyə çalışdıqları, əslində olmayan cəhənnəm odu da nə imiş beynimdəki mini cəhənnəmin yanında. Gözləyirəm də yeniyetmə bayquş. indiki hədəfim sənin hədəfindən çox uzaqdır. Amma necə ki sən qarşına hədəf qoydun, uğur qazandın mənim də indi bir hədəfim var. Səbrlə gözləyirəm hədəfə çatacağım günü.