Birinci vitse-prezident Mehriban Əliyevanın TƏBİB sistemində çalışan tibb işçilərinin əməkhaqlarının artırılması təşəbbüsü səhiyyə sahəsində çalışanların sosial rifahının yaxşılaşdırılması baxımından mühüm addım kimi qiymətləndirilir. Təşəbbüs Prezident İlham Əliyev tərəfindən dəstəklənib və onun icrası ilə bağlı müvafiq tapşırıq verilib. Mövzu ilə bağlı Milli Məclisin İnsan hüquqları komitəsinin sədri Zahid Oruc Modern.az-a açıqlama verib: "Azərbaycan Respublikasının Birinci vitse-prezidenti Mehriban Əliyevanın təşəbbüsü ilə TƏBİB sistemində çalışan tibb işçilərinin əməkhaqlarının artırılması səhiyyə işçilərinin sosial vəziyyətinin yaxşılaşdırılması ilə yanaşı, əhaliyə göstərilən tibbi xidmətin keyfiyyətinin artırılmasına yönələn mühüm addımdır.
Azərbaycan səhiyyəsinə son illərdə xəstəxanaların tikintisi, tibbi avadanlıqlar, icbari tibbi sığorta və idarəetmə sisteminin yenilənməsi istiqamətində böyük vəsait yatırılıb. İndi isə əsas diqqət həmin sistemi işlədən insan kapitalına yönəlib. Sentyabrın 1-dən tətbiq olunan yeni əməkhaqqı siyasəti TƏBİB tabeliyində çalışan 72 min 212 tibb işçisini əhatə edir.
İllik əməkhaqqı fondunun 189 milyon manat və ya 13,66 faiz artırılması nəzərdə tutulur. Ailə həkimlərinin əməkhaqqının 1150 manatdan 2000 manata, bəzi təcili tibbi yardım həkimləri və anestezioloq-reanimatoloqların maaşının isə 3000 manata çatdırılması planlaşdırılır. Bu artım bütün sahələrə eyni yanaşma deyil.
Daha çox ehtiyac duyulan ixtisaslar, ağır xidmət sahələri və regionlarda çatışmayan mütəxəssislər xüsusi olaraq stimullaşdırılır. Məqsədlərdən biri peşəkar həkimlərin ölkədə saxlanılmasıdır. Çünki həkim illərlə təhsil və təcrübə nəticəsində yetişir və onun ölkədən getməsi ciddi insan kapitalı itkisi yaradır.
Digər mühüm problem regionlarda həkim çatışmazlığıdır. Müasir xəstəxana və avadanlıq olsa da, peşəkar mütəxəssis yoxdursa, həmin infrastruktur öz imkanlarını tam reallaşdıra bilmir. Buna görə regionlarda çalışan həkimlər üçün yüksək əməkhaqqı ilə yanaşı, mənzil, sosial təminat və peşəkar inkişaf imkanlarının genişləndirilməsi vacibdir.
Bu məsələ işğaldan azad edilmiş Qarabağ və Şərqi Zəngəzurda xüsusi əhəmiyyət daşıyır. Böyük Qayıdış yalnız insanların doğma torpaqlarına qayıtması deyil, həm də həkim, müəllim, mühəndis və digər mütəxəssislərin həmin ərazilərdə yeni həyat qurmasıdır. Ağdam, Füzuli, Zəngilan, Laçın, Kəlbəcər və digər yaşayış məntəqələrində səhiyyə infrastrukturunun yaradılması ilə yanaşı, burada peşəkar tibbi kadrların uzunmüddətli fəaliyyəti təmin edilməlidir".
Extract — continue reading at the source.
