Mina təhlükəsi ilə mübarizə beynəlxalq əməkdaşlıq tələb edir. APA xəbər verir ki, bunu Çin Xarici İşlər Nazirliyinin Silahlara Nəzarət Departamentinin müşaviri Shen Zhang Bakıda “Şəhərlərin bərpası üçün humanitar minatəmizləmə: Təhlükəsiz yaşayış məskənləri üçün mükəmməllik standartlarının müəyyənləşdirilməsi” mövzusunda 4-cü Beynəlxalq Minatəmizləmə Konfransındakı çıxışında deyib. Shen Zhang bildirib ki, partlayıcı sursatlarla çirklənmiş ərazilər insanların gündəlik həyatına, kənd təsərrüfatına və sosial-iqtisadi inkişafa ciddi maneələr yaradır.
O qeyd edib ki, minalarla çirklənmiş ərazilərin təmizlənməsi insanların təhlükəsizliyinin təmin olunması ilə yanaşı, yaşayış məntəqələrinin bərpası və iqtisadi fəaliyyətin yenidən canlandırılması üçün də vacibdir. Çin rəsmisi Azərbaycanın mina təhlükəsi ilə mübarizə sahəsində gördüyü işləri yüksək qiymətləndirib və bu istiqamətdə beynəlxalq əməkdaşlığın vacibliyini vurğulayıb. Onun sözlərinə görə, mina təhlükəsinin aradan qaldırılması yalnız ərazilərin təmizlənməsi ilə məhdudlaşmamalı, həmçinin həmin ərazilərdə yaşayan insanların təhlükəsiz və normal həyata qayıtmasını təmin edən daha geniş bərpa prosesinin tərkib hissəsi olmalıdır.
Shen Zhang qeyd edib ki, beynəlxalq ictimaiyyət mina təhlükəsi ilə üzləşən ölkələrə dəstəyini davam etdirməli, təcrübə və texnologiya mübadiləsini gücləndirməlidir. O, həmçinin mina təhlükəsinin aradan qaldırılması istiqamətində səylərin sülh, təhlükəsizlik və davamlı inkişaf məqsədləri ilə əlaqələndirilməsinin vacibliyini diqqətə çatdırıb.
Extract — continue reading at the source.
