19.02.2021-ci ildə Bakı Humanitar Kollecinin direktorunun onlayn imtahan zamanı tələbəyə dediyi və cəmiyyət tərəfindən məzəmmət edilməsinə səbəb olan ifadə. Konseptual olaraq mənfi bir mənası olmasa da, xalqın adət-ənənələrindən irəli gələn psixoloji-seksual böhranlar səbəbilə (bir çox feillərimizin də başına gətirildiyi kimi) seksual konnotasiyaya məruz qalması üzündən bədnam ifadəyə çevrilmiş məsum söz. Analoji hal xalq artisti Alim Qasımovdan Türkiyədə müsahibə götürən aparıcı Okan Bayülgenin də başına gətirilmişdi (baxma: kayırmak/qayırmaq). Faciəvi tərəfi orasıdır ki, küçə jarqonunda belə sözlərin həqiqi mənada ifadə edildiyini bildirmək üçün sözün əvvəlinə "türkün məsəli" törəməsini artırırlar. Hesab edirəm ki, bu və belə "etika/ədəb" problemlərinin hamısı camaat şüurundan cəmiyyət şüuruna təkamül edə bilməyən, müasir don geyinmiş bir ənənə ölkəsinin mürtəce mentalitetinin acı nəticəsidir.
