ikinci qarabağ müharibəsi

Qardaşlarım. Bura inbox deyil ki, entry yazıb bir-birimizi söyüşə boğaq. Bura küçə də deyil. Keçək əsas məsələyə.
Mən razıyam ki, indi biz qalib gəlsək də 30 il sonra ermənilər yenidən güc sahibi olub başımıza olmazın oyunlar gətirə bilərlər. Yəni 30 ilə bu gün də görürük ki, çox şey dəyişir.
Hə, bunu da deyim. Hər kəsin vətənpərvər olmaq kimi bir borcu yoxdur. Kimin bu torpaqda nə gün gördüyünü (və ya görmədiyini) bilmirik. Sadəcə gözünüzü bu torpaqda açmısınız deyə azərbaycan haqlı da olmur. Sadəcə qismət və tale belə gətirib ki, bir neçə yüz kilometr o yanda doğulmamısınız.
Yenə, razıyam o fikirlə ki, biz ermənilərdən vicdan cəhətdən artıq deyilik. Mənə aşılanan nifrətdə deyilirdi ki, erməni başımıza belə işgəncələr gətirib. Ölü ilə məzələnib. El oğlumuz Kamil göstərdi ki, ətrafımdakılar da ona dəstək çıxaraq sübut etdi ki, vicdan cəhətdən heç bir üstünlüyə malik deyilik.
Gələk müharibə haqda düşüncələrimə. Amalımız əfkarımız yoxsa, şəhidlik “zirvə”sinə hazırıq. Yox arzusu və hədəfi olan kimsənin ölməyə istəkli və hazır olduğunu düşünmürəm. Bu iki millət arasında niyə nifrəti alovlandırdıqca alovlandırırıq, onu da anlamıram. Mənə görə erməni defence moda keçib və özünü müdafiə məqsədilə hər yola əl atır. Öz torpağı kimi gördüyü yerə hücum olunur çünki. indi deyilə bilər ki, ora onun torpağı deyil, razıyam. Fəqət 30 ildir yaşayır orada (və ondan çox çox əvvəl də yaşayırdı orada).
Öz atalarının və qardaşlarının ölməsini təsəvvür belə etməyib “biz gedək qabağa, şuşaya!” Deyən gənc qızları da bir ayrı boğmağım gəlir. Orada robotlar savaşmır, insanlar ölür. O ölülərlə məzələnirlər.
Heç vaxt özümü bu yaşadığım şəraiti sevməyə məcbur etməyəcəm. Seviləsi çox bir şey görmürəm. Buna görə mən nə edə bilərəm, öldürüm bəlkə özümü?
Əslində bu entryni yazmağı planlamırdım. Birdən oluvərdi türklər demiş. Umbayla məni rübabə!

kim kardashian

Çox hörmət etdiyim bir qadın.
Prostitutka, fahişə kimi sözlər çoxdan söyüş sayılmır. Bunu biləsiniz. Mən qoymaram ki, seks işçilərinə təhqir oluna. Bu platformada yox. Bilirsiniz nəyə bənzəyir? Kiməsə gey deyib onu söydüyünü düşünməyə. Yox, burada klaviatura canavarlığı etməklə bir şey olduğumuzu düşünürüksə məncə bu fahişədən ağır vəziyyətdir axı, elə deyil? Hə, lap mən fahişlik edirəm. Bədənimi satıb bununla olmazın pullar qazanıram. Söyə bilərsiniz məni, buyurun, gözləyirəm.
Kim Kardashianın bir kilometr yaxınına da gələ bilməyəcək olan bizlər, onu görsək söymək nədir, şəkil çəkdirərik. Çünki o şəklin dəyəri burada yazdığımız söyüşlərdən yüz qat artıqdır. (Qorumaları bizi milçəkdən fərqsiz görüb uzaqlaşdırar, o heç.)
indi keçək niyə hörmət elədiyimə. Bu insan bir seks kaseti yaymaqla ekonomik cəhətdən dara düşən ermənistanı (atasının ata ocağını) dolandıracaq qədər nəslinə pul qazandırmışdır. Bacısı dünyada ən çox qazanan model, o biri bacısı makiyaj dünyasının ağası milyarder və əri də abş prezidentlik adayı.
Və biz hələ də “ala qəhbə hahagaga”.
Yox, qəhbə bizik. Bizdə elə bir adam yoxdur ki, dursun 160 milyon təqibçisinə yazsın ki, erməni bizi işğal edib. Niyə yoxdur? Çünki bizdə qeyrət var ulan! Başımıza dəysin qeyrət. Hələ bir poxa dərman olmuyub.
Kaş ki, bizdə də kimsə belə nüfuzlu olardı. Kim kardashian bu dəqiqə amerikan şou biznesində at oynadır.
Amma qəhbədir. Nə var nə var bircə dənə kaset çıxardıb.
(Ps: kaş bizdə də olaydı o qəhbədən)

kefi pozan xırda şeylər

Yaşımız keçdikcə ailəmizin etdiyi hər xırda şeyə əsəbləşib mız qoymağı tərgidirik. Ən azından mən tərgidirəm. Onların bizim üçün bəzən həyatlarını fəda etdiyini görüb dərk edirik. Dəyməz əslində, amma bu başqa zamanın söhbətidir.
Amma bir məsələ var ki, doğma xalqımda özünü yaman göstərir. Neqativi yığıb, yığıb üstümüzə boşaltmaq.
Əziz ailəm. Hər şeyə görə sizə minnətdaram. Pis və yaxşı, mənəvi iztirablarımın qurtaracağı günə çatacağıma inanaraqdan sizlərlə yaşayıram. Amma beynimdə bu dediyim iztirabsız dünyaya qovuşmağın yollarını ararkən bəzən it-bat oluram, kədərlənirəm, bunu da bacardığım qədər özümdə saxlayıram. Sonra siz də gəlib heç bir qlobal əhəmiyyət daşımayan iztirablarınızı üstümə qusub gedirsiniz. Eşitmişdim ki, Yaponiyada kiminsə yanında dərindən ah çəkmək mədəniyyətsizlik sayılır. Ah nə gözəl! Sanki bu millətin ah-naləsi bitmir axı. Bəs bizim dərdimiz yoxdur? Sizcə sizdən azdır? Niyə gəlib neqativinizi bizlərə yüklüyüb hələ bir reaksiya da gözləyirsiniz?!
Ölkəmiz dramadan bəslənir elə bil. Bəlkə də özlərinin diliylə desək “beş para etməz” türk dramaları buna görə ölkəmizdə belə məşhurdur? Nədir bu yersiz neqativin, dramanın kökü?
Niyə hamı əxlaqdan danışıb Bihtər öləndə ağlıyır? Yoxsa... bu xalqın ürəyindən bihtərlik eləmək keçir də, abır edib neqativ yığırlar?
Nə isə, mövzudan uzaqlaşdıq. Bir ev daxilində sənin draman sənə yetir və artır, fəqət bəzən məcburiyyətdən və azərilikdən doğan şərtlər bizi məcbur edir ki, bir bədəndə 4 nəfərin neqativini daşıyaq. Bəlkə ona görə biz xoşbəxt deyilik?

erməni adam deyil deyən azərbaycanlı

Sözlüyün formatı mı dəyişib, yoxsa necə? Qarşılıqlı entry yazmaq olmaz, qardaşlar bacılar. Biri dedi, o biri cavab verdi söhbəti burada keçmir. Bu belə.
ikincisi, qisasa qisas deyir bəzilərimiz. Amma onda bizim onlardan çox da fərqimiz olmur. Erməninin etdiyini ona et, fəqət sabah demə ki, ondan nədəsə üstünsən. Deyilsən.
Sənin qadınına təcavüz olunub, sən də onun günahsız qadınına təcavüz etmək haqda xəyal qur. Alqışlar, oldun ali irqin nümayəndəsi! “Nağardın” a sən!
Erməninin biri o gün yazıb ki, sən türk deyilsən ey azəri! Get bir güzgüyə bax gör türkə oxşuyursan? Düz deyir də balamsan. Gürcüyə, erməniyə, bir sözlə Qafqazlıya oxşuyuruq biz azərbaycanlılar. Fəqət öz dediyini özü təqzib eləmiş də olur. Onların da çoxu bizə oxşuyur axı.
Nə isə. Bu çox həssas məsələdir. Heç zaman millətə bütünlüklə nifrət edə bilmərəm. Bəlkə də bu mənim səhvimdir. Yenə də qayıdıb yuxarıdakı iki punktu oxuyuram. Sonra öz fikrimə geri dönürəm.

sözlükdən soyuma səbəbləri

Bəlkə ancaq mənə aid ola bilsə də, “dəyişək, inkişaf edək” devizinin həyatıma özümdən asılı olmadan giriş etməsi deyərdim mən. Düzü, 9-cu nəsil bir yazar olan mən aylar öncə yazdığım entrylərə baxıb şok keçirdirəm. ilahi, bunu mən yazmışam? Fəqət düşünəndə görürsən ki, bu təbiidir. Mən aylar öncəki mən deyiləm. illər öncəki “toy” mən heç deyiləm. Düşünürəm ki, bir zamanlar bura yazmaq üçün alışıb-yandığımız mövzular artıq bizə bayağı və maraqsız gələ bilir. Ona görə də soyuyuruq bu ana yuvamızdan. Adi bir misal, nikimin əxlaqsız əxlaqlı olması mənim aylar öncə içimdə gedən burulğanın və mənəvi böhranın yansıması idi. Əxlaqla məzələndiyim entrylərim göz qabağındadır. indi isə mən özümü yəqin ki karantindən dolayı qurumuş taxta kimi hiss edirəm. Yəni heç bir əxlaqa zidd hərəkətə meyllilik duymuram və bu da məni sözlükdən uzaqlaşmağa vadar edir. Fəqət qorxulu bir şey yoxdur. Əli güclə söz tutan bəzi yeni yazarlarımız da mənim kimi bişib çıxacaq və sözlük yenidən çiçəklənəcək. Mən də öz növbəmdə içimdə alışıb-yanan başqa bir burulğan tapacaq və o haqda münaqişə doğuracaq fikirlərimi sözlüklə bölüşəcəyəm. Hər saniyə dəyişib “evolve” etməyimiz məni valeh edir! Deyəsən çox poetik ruha büründüm axı mən... tezliklə “gəlin niyə qırmızı lent taxmalıdır” mövzusunda şit entrylər yazmağa həvəsimin yaranması diləyi ilə!

bal

Hamımızın möcüzəvi qida bildiyimiz bal elə də möcüzəvi deyilmiş. Oh bu necə olur?
Bir gün internetdə titulu adından böyük bir şəxsin yazısını gördüm: “bal elə şəkərdir dəə...” Axı yox, bu necə ola bilərdi? Bəs bizə öyrədilənlər? Onun içindəki min bir dərdə dərman minerallar? Həə... uzun araşdırmadan sonra aydın oldu ki, bal da, maple syrup dediyimiz ağcaqayın siropu da, ağ və qəhvəyi şəkər də “eyni bezin qırağı” imiş. Bal da şəkərdir, onu təsnif edərkən “added sugar” yəni əlavə edilmiş şəkər kimi götürürlər. Məcbur olub onu da qidamdan kəsdim. Hər gün ha onu yemiş, ha şəkəri, çox da fərqi yoxdur. Bəzi insanlar onun faydalarını misal çəkə bilər, fəqət çox deyildir. Hətta təkcə şəkər olaraq kateqorizə ediləcək qədərdirsə özünüz düşünün. Bunu da deyim ki, arılar özləri arıçılar tərəfindən şəkərlə bəsləndirilir. Bu da belə. Bal da getdi.
Axırda da sizə quote gətirirəm.
“At the end of the day, honey is simply a "less bad" sweetener than sugar and high-fructose corn syrup.” Healthline.

kitab oxumaqla özünü bir şey zənn etmək

Sözlükdəki bəzi yazarların da əziyyət çəkdiyi hal, vəziyyət. insanı sözlükdən soyudan səbəb də desəm uyğun olar. Kitab oxumaq sənin dünyagörüşünü artırar, sənə həyat məktəbindən dərslər öyrədər. Fəqət bu yolda “mənim bildiyim gerçəklər gerçəklərdir” ab-havasına girib xoşuna gəlməyən hər fikrin sahibinə kitab qoxusundan uzaq cahil kimi baxmaq... nə bilim. Mənə görə sadəliyi itirdiyimiz an cahilliyə qovuşuruq. Oxuduğumuz kitabların sayını yarışdırıb kimdənsə üstün olduğumuza qərar verməzdən öncə dönüb bir az təvazökarlıq kitabından da səhifə çevirək.
Yox, sənin dediyin hər şey həqiqət deyil. Yox, mənim heç vecimə deyil sən neçə kitab oxumusan. Çünki sən başa düşmürsən ki, fərqli insanlar, fərqli fikirlər və dünyagörüşləri var. Sözündə azadsan, hörmətdə məcbur.
Kitab oxuyub özünüzü yığışdıra bilməyəcək səviyyəyə gələcəksinizsə, lütfən oxumayın. Ağzınızın ağ qatığını kitabların sarı səhifələri ilə səhv salmayın. Sadəcə başqalarına yuxarıdan aşağı baxmaq üçün və onlardan üstün olmaq üçün oxumayın. Çünki hələ ki bir kəs ola bilməmişik.

rus bölməsi

Bəzi başlıqlara elə entrylər yazılar ki, nöqtəsi qoyulmuş kimi olar. Daha əlavə heç nə yazmaq istəməzsən. Fəqət bu başlığa yazmağı lazım gördüm. Başlayaq ondan ki, bu “azsektor” qardaş və bacılarımızın həmişə “russektor”a qarşı çəkingənliyi olub. Səbəbi mən çox zaman dil bariyerində görmüşəm. Məktəb dövrlərimdə indi olduğumdan qat-qat daha mehriban və sosial idim, bu səbəbdən də rus sektordan dostlar qazanmışdım.
Şok, şok! Onların başında iki buynuzu, arxalarında sallanan quyruğu yoxdur! Nə də yadplanetli deyillər. Bilirəm, inanmaq çətindir. Axı onlar özünü göylə aparan elit təbəqədirlər. Və ya daha da yaxşısı, Sovet sistemi ilə gedən səfeh yığnaqları. Əxlaqsız allahsızlar?
Yox, əzizlərim. Onların sizdən, məndən heç bir fərqi və ya əksikliyi yoxdur. Rus sektor dostumun da dediyi kimi “əlinə təsbeh alıb rusca danışan qaqaşlar” burada da mövcuddur. Başqa dünyada da yaşamırlar, düzdür, bəzən nə qədər azad olduqlarına baxıb mən də elə düşünürəm. Onlarda da başıbağlı qızlar olur, onlar da əxlaq problemli nəsil yetişir. Bu “başıboş səfeh kütlə” oturub rusca ədəbiyyat da oxuyur, azərbaycanca da oxuyur. Sən də oxuyursan? Lap yaxşı. Onda çox da yorma məni.
Xülasə. Bu iki sinif arasında tək problem ünsiyyətin yaratdığı çətinlikdən doğan qorxudur. Rus dilini öyrənməyə çalışa və ya doğma dilinizdə onlara müraciət edə bilərsiniz. Səndən, məndən yaxşı danışırlar ana dilimdə. Sevgiylə qalın, hörmətlə qalın.

avataria

Başıma gələn qorxunc hadisəni, nəhayət, paylaşmaq qərarına gəldim. Avataria facebook platformasında oynaya biləcəyimiz, fəqət anonimliyin qorunduğu bir oyundur. Bir avatar yaradırıq və real insanlarla ünsiyyətdə oluruq. Fəqət sən qarşındakının əsl yaşını, hətta cinsini belə bilmirsən. Mən bu oyun haqda eşitdiklərimi (türk mənbələri bar-bar bağırır) yoxlamaq üçün qız avatarı yaratdım. Qəşəng onu bəzədim. Apardım qızı kluba. Az sonra mənim oyundakı evimə sarışın, amerikansayağı bir gədə təşrif buyurdu. ingiliscə dediklərini tərcümə edirəm:
“Seks edək?”
“Burada etmək olur ki?”
“Hə. Tez soyun.”
Nə hikmətdisə avatarımı soyundurmaq oldu, bir də gördüm bu gədə lütlənib avatarın arxasına keçdi və... sonrası məlumdur. Düzü, gözlərimə inanmadım. Oyunda bunu necə məharətlə təsvir etməklərinə, gədənin işini görən zaman iyrənc şeylər yazıb göndərməsinə, hətta dərhal sonra oyundakı evindən məni qovduğuna dair bildirişin gəlməsinə mən inana bilmədim.
indi bir dəqiqə. Bu gədəyə razılıq verən mən idim və şükür edirəm ki, uşaq deyiləm. Dəhşətli bir təcrübə oldu mənim üçün. Uşaqların da bu oyunu oynadığını bilirəm və öz adıma, heç bir zaman uşaqların internetin çirkin tərəflərindən uzaq tutulub sonra real həyatda bu çirkinliklə daha çox əziyyət çəkməsinin tərəfdarı deyiləm. internetdi, o da görəcək, səhvi-düzü fərqləndirib böyüyəcək, bərkiyəcək. Fəqət bu başıma gələn qoy burada dursun. Oyunda belə şeyi nəinki uşağın, heç böyüklərin düzəməlli həzm edə biləcəyindən əmin deyiləm.

droit du seigneur

Droit du seigneur-lordun haqqı. ilk gecənin haqqı da adlandıra bilərik. Bu qanunun məğzi lordun tabeçiliyi altında olan qadınlarla qanun adı altında birlikdə olmasıdır. Hələ bunun bir üst variantı da var, kişi kənizin evlənirsə və onun arvadı sənə xoş gəlirsə “lordun haqqı” sağ olsun, ilk gecə o sənindir. Elə lord olub ki, evlənən yeni cütlüyü “lordun haqqı” ilə hədələyib və deyib ki, gəlinin cehizindən ona pay verilməsə, ilk gecəni özü həll edəcək. Bu məqsədlə evlilik mərasimi həyata keçirən din xadimləri cütlüyə bəzən ilk gecəni qadağan edirmiş ki, “bəlkə ağan gələr, haqqı olanı alar.”
Əsasən orta əsrlərdə mövcudluğu təsdiqlənmiş zadəganlar, lordlar, yüksək təbəqənin şəxsləri tərəfindən istifadə edilən haqq, hüquq olub. Avropada mövcud olmaqla bərabər, haqqında ən çox məlumatımız olduğu bölgələr Fransa və Şotlandiyadır.
Ps: adı mənim dadı sənin?

feminizm

Feminizm nədir? Feminizm, sadə dillə desək, qadın və kişilərin hüquqlarının bərabərliyidir. Hər şey bu qədər sadədirmi? Heç zaman yox.
Əvvəlcə equalistlər haqda danışmaq məqsədəuyğun olardı. Bərabərlik əslində adından da göründüyü kimi bu başlığa daha uyğun gəlir. Çox kişi cinsinin nümayəndəsi iddia edir ki, qadınlar kişi düşmənçiliyi edir feminizm adı altında. Kişi düşməni deyilsən? Onda equalist ol deyirlər. Bu məsələdə şəxsi düşüncəm: qaradərili qardaşlarımın haqsız ölümü ilə bağlı “qaraların həyatı önəmlidir” şüarı yayılmışdı bir ara. Bu vaxtda da ağ dərililər “Bütün həyatlar önəmlidir” şüarını ortaya atdılar. Görürsünüz necə dəxilsizdir? Öldürülən qaradır, ağ deyil.
Yuxarıdakı iki şuar üçün izah: Mən irqçi deyiləm, fəqət göz qabağındadır ki, qaradərilinin mənim dəstəyimə daha çox ehtiyacı var. Mən cinsiyyətçi deyiləm, fəqət qadınların daha çox qorunmağa ehtiyacı var. (Feminizm və equalistlər)
Amma və lakin! Feminizmin dırnaqarası üzvləri bu kəlməyə nifrətə səbəb olublar. Artıq heç kim rahat şəkildə “mən feministəm” deyə bilmir. Feminizmi kişi düşmənçiliyi ilə səhv salan təbəqə yaranıb. Xeyr! Əgər uşağın himayəsi ilə bağlı məhkəmə işi gedirsə, bir feministin dəstəyi əyyaş, işsiz, vecsiz anaya deyil, uşağı sevən, ona baxa biləcək atayadır. Bu məntiqlə yanaşanda kişilər də feminist ola bilər, deyə bilər ki, qadına qarşı şiddət istəmirəm. Eyni işi görüb məndən az pul alsın istəmirəm. Evdə oturub “çölə çıxma, kartof qızart” qadağası yeməsinə qarşıyam deyə bilər. Amma feminizmin dırnaqarası üzvləri “bütün kişilər zibildir” kimi şüarlar səsləndirdikdən sonra çətin ki, müttəfiq qazanılsın.
Ps: bunun bir də qadınlara qarşı düşmənçiliyi olub, eqosuna onlarla bərabər olmağı yedirə bilməyən it ilxısı köpək sürüsü tərəfi də var. Bunlardan olmayaq, yetər.

exlaqsızexlaqlı

bir məsələyə aydınlıq gətirmək istəyirəm. ard-arda yazdığım üç entry bir az səs-küyə səbəb olub. bir şey deyim ki, bu son günlərdə bilgi verən tək-tük yazılar var. niyə? çünki belə görürəm, oxuyucularımızı o qədər də maraqlandırmır. on dəqiqəyə yazdığım, olduqca mənasız, heç bir şəkildə bilgi verməyən başlıqlar ana səhifəyə düşdü, müzakirəyə qoyuldu, adıma başlıq açıldı, amma “qızılgül olmayaydı”, “dədə qorqud” “vaqif dramı” kimi araşdırıb, sevgi verib yazdığım entrylər heç kimin qozuna olmur. mən o ana səhifəyə düşən, “gözünüzdən qan gətirən” üç entrydən ibarət deyiləm, amma görünür oxuyucuların marağına səbəb olan da bu tip yazılardır. 7-8 umbay almış o entrylərə umbay atanların da marağına səbəb olub ki, oturub oxuyublar da bəs. şəxsən öz adıma, arada belə öz fikirlərimizi bildirdiyimiz başlıqlar ola bilər, amma əsasən bilgiyə qiymət vermək tərəfdarıyam. amma yenə də deyirəm, oxuyucular buna o qədər də maraq göstərmir. oxunulmayan bilgini paylaşmağa davam edəcəm. edənləri də ana səhifədə görməkdən xoşbəxtlik duyacam. sadəcə axıracan oxuyub, əjdahalayıb, umbayladığımız entryləri ana səhifəyə salanda günahı yazarda yox, özümüzdə də görək bir az. onun tək yazdığı bu deyil, amma bizim tək oxuduğumuz budur.

sözaltı sözlük

Bir məsələyə aydınlıq gətirmək istəyirəm. Ard-arda yazdığım üç entry bir az səs-küyə səbəb olub. Bir şey deyim ki, bu son günlərdə bilgi verən tək-tük yazılar var. Niyə? Çünki belə görürəm, oxuyucularımızı o qədər də maraqlandırmır. On dəqiqəyə yazdığım, olduqca mənasız, heç bir şəkildə bilgi verməyən başlıqlar ana səhifəyə düşdü, müzakirəyə qoyuldu, adıma başlıq açıldı, amma “qızılgül olmayaydı”, “dədə qorqud” “vaqif dramı” kimi araşdırıb, sevgi verib yazdığım entrylər heç kimin qozuna olmur. Mən o ana səhifəyə düşən, “gözünüzdən qan gətirən” üç entrydən ibarət deyiləm, amma görünür oxuyucuların marağına səbəb olan da bu tip yazılardır. 7-8 umbay almış o entrylərə umbay atanların da marağına səbəb olub ki, oturub oxuyublar da bəs. Şəxsən öz adıma, arada belə öz fikirlərimizi bildirdiyimiz başlıqlar ola bilər, amma əsasən bilgiyə qiymət vermək tərəfdarıyam. Amma yenə də deyirəm, oxuyucular buna o qədər də maraq göstərmir. Oxunulmayan bilgini paylaşmağa davam edəcəm. Edənləri də ana səhifədə görməkdən xoşbəxtlik duyacam. Sadəcə axıracan oxuyub, əjdahalayıb, umbayladığımız entryləri ana səhifəyə salanda günahı yazarda yox, özümüzdə də görək bir az. Onun tək yazdığı bu deyil, amma bizim tək oxuduğumuz budur.

vaqif dramı

Səməd Vurğunun yazıb-yaratdığı dram. 1937-ci ildə heca vəznində yazılmışdır. Bir neçə məsələyə aydınlıq gətirək.
Vaqifin şorgöz olması ilə bağlı fikirlər əsassız deyildir, fəqət dramda öz əksini tapmamışdır. ibrahimxəlil burada mənfi, tarixdə isə, əsasən, müsbət obraz olmuşdur. ibrahimxəlilin-Qarabağ xanının Mircəfər Bağırov ilə müqayisəsi yersiz deyildir, lakin Səməd bəy özünün Mircəfərlə əlaqəsinə bu yolla haqq qazandırmaq istəmişdir. Xanın əsəbləşib özündən çıxdığı zamanlarda Vaqifin onu vəzir olaraq sakitləşdirdiyini təsvir edərək göstərir ki, guya Səməd də Mircəfərin yanında duraraq onu sakitləşdirir. Səmədlə bağlı fikirlər birmənalı deyil, ona inanıb-inanmamaq oxuyuculara qalır.
Əsərdə Vaqifin oğlu Əli bəy, Vaqifin arvadı, Şah Qacar və Təlxək kimi arada gəlib dəxilsiz cümlələr qurub qaçan obrazlar mövcuddur. Vaqifin oğlunun toyunda Vaqifin yeni gəlninə “aç üzünü, o örpəyi çıxar” kimi fikirlər səsləndirməsi, bəlkə də, vaqifin qadınlarımızı azad görmək istəməsindən irəli gəlir. Əsər boyu görürük ki, Vaqifin könlü kəndlilərin, adi çoban babaların yanındadır, fəqət vəzir olduğu üçün heç cür bu yerlərə tam qayıda bilmir. ibrahimxəlil isə əksinə, çoban və onunla eyni maddi çətinlikləri yaşayan insanların vəzirin oğlunun toyunda nə işi var, anlamır, əsəbləşir, tələsik qərarlar verir.
Vaqifin arvadı Xuraman əsərin ortasında şan-şöhrət, pul istəyərək ibrahimxəlillə əlaqəyə girir. Sonra deyəsən peşman olur və atır özünü pəncərədən aşağı. Məhz bu hissədə bir çox oxuyucu Vaqif üçün “əkdiyini biçdi” tərzində ifadələr səsləndirir, çünki Vaqifin gözünün gəzdiyi sirr deyildi və hər gördüyü gözələ şeir yazardı. Təbii, təqdir oxuyucuların.
Gəldik qana susamış Qacara. Bədbəxt qacara. “Qatır cinsisiniz, doğub-törəməz,” deyərək onsuz da ürəyi nakam Qacarı bir az da qəzəbləndirib Qacarın işğala keçməsinə şərait yaradırlar. Qacar da bir cür bədbəxtdi, həyatdan nə istədiyini axtararkən özünü qorumağa çalışan bədbəxt.
Əsərdə möhtəşəm dialoqlar gedir. Səməd bəyin qələmi burada oxuyucuları heyran qoyur.
“Şair, hökmdarın hüzurundasan!”
“Bunu sizsiz belə düşünürəm mən.”
Hökmdarın hüzurunda niyə əyilmədiyini izah edən Vaqif:
“Əyilməz vicdanın böyük heykəli!”
“Vicdan dedikləri bir həqiqətdir- beşiyi, məzarı əbədiyyətdir.”
“Görünür günəşə iştahan vardır?”
“Günəşdən gizlənən yarasalardır.”
Qacar Vaqifdən fars dilində yazmasını tələb edir. Hələ durub “ayağı çarıqlı kiçik bir ölkə Firdovsilər yaratdı bəlkə?” Deyə səslənir.
“Sizin güldüyünüz çoban torpağı Nizamilər, Füzulilər yetirmiş!”
Sonda qacarın planı yerinə yetə bilmir və hər kəs xoşbəxt olur. Təkcə deyişmə-dialoqlara görə oxunulması lazım olan sənət əsəridir.

neymar

Neymarın 52 yaşlı anasının Neymardan 6 yaş balaca yeni sevgilisi gündəmdədir. 2016-cı ildə 25 illik ərindən ayrılan ana xanım yeni sevgilisi ilə çox xoşbəxtdir və sosial şəbəkədə onunla şəkil də paylaşıb. Neymar anasının xoşbəxtliyinə xoşbəxt olacaq ki, şəklin altına “xoşbəxt ol, anacan” yazaraq bir ürək də qoyub. Neymarın atası, yəni bu ana xanımın keçmiş əri, şəklin altına alqışlayan emojilərdən döşəyib. Buradan çıxardığımız nəticə nədir? Alan məmnun, verən məmnun, yeyən məmnun. Birinci dərəcəli qohumların hamısı məmnun.
indi keçək görək sevimli həmvətənlərimizin reaksiyası necə olub?
“Neymar peysər çıxdı ayə.”
“Neymar, ay səni qeyrət ağacı.”
“Neymar, qeyrətin necə götürdü?”
Durub izah da edə bilmirsən ki, ay mübarəkbaz, sən qeyrətli olub neynəmisən? Neymarın çatdığı zirvənin qarı olmusan bəlkə? Heç bunu qoydum bir qırağa. Neymar anasının xoşbəxtliyinə xoşbəxtdirsə, anası da həyatını quruyaraq yox, əksinə sevgi ilə əhatəli şəkildə keçirtmək istəyirsə bunun nəyini qınayırıq? Ərindən ayrılan hər qadın qurusunmu istəyirik? Əgər sizin, bizim, torpağına qurban olduğum ölkənin qeyrət anlayışı xoşbəxtliyimizin önünü kəsirsə, bəlkə elə səhv olan bizik? Neymar yox, Neymarın atası yox.
Əziz Neymar, səni də, ölkənin xoşbəxtlik anlayışını da ürəkdən dəstəkləyirəm. Altı hərfli sözə görə ananın xoşbəxtliyinin önündə dayanmayan sən və sənin doğma atan, əsl kişidir!

Açıq münasibət

Açıq münasibət nədir? Ölkəmizdə mövcuddurmu? Bu gün bunlara aydınlıq gətirəcəyik.
Bəli, açıq münasibət ölkəmizdə ən iyrənc şəkildə mövcuddur. Evli kişilər həyat yoldaşları bilə-bilə başqa qadınlarla münasibətdə olurlar. (Qadınlar üçün ərləri bilə-bilə bunu etmək çox da mümkün olmasa da, olanda olur.) Bu, bizim open relationship anlayışımız.
Amma əsl open relationship iki tərəfin razılığı ilə başqaları ilə də cinsi əlaqədə olmaqdır. Çox zaman hər iki partnyor da müxtəlif şəxslərlə birlikdə olur.
Keçək öz şərhimə. Mən buna necə baxıram? Uzun araşdırmalardan sonra insanların tək eşli olmadığı qənaətinə gəldim. Bir serialda deyir, “əgər növbəti 1000 orgazmının kim tərəfindən gələcəyini bilirsənsə, həyatın nə mənası?” Heç kim də zəhmət çəkib danmasın. Biz buyuq. indi elə deyilik? Onda evlənəndən 10 il sonra olacağıq, gözlərimiz gəzəcək, aşağıdakı orqan başqası üçün duracaq. Heç olmasa hər iki tərəf oturub bunu müzakirə etsin və açıq münasibətə keçsinlər. Mən səni də istəyirəm, amma başqalarının mənə verəcəyi həzzi də. Bunu demək bir-birinin arxasından iş çevirib heç nə bilmirmiş kimi davranmaqdan çətin olmamalıdır.
Ps: yazdığım digər hər şey kimi bu entry də mənim şəxsi düşüncələrimdir. Heç bir şəkildə mən düzəm, mənim əksim səhv düşüncəsində deyiləm.