Trend xəbər verir ki, Portuqaliyanın Portimao şəhərində keçirilən batut gimnastikası və tamblinq üzrə Avropa çempionatında Azərbaycanı 23 gimnast təmsil edir. Batut üzrə fərdi proqram üzrə təsnifat mərhələsindən sonra Selcan Mahsudova, Maqsud Mahsudov, Nicat Mirzəyev, Hüseyn Abbasov, Əmmar Baxşəliyev və Fərhad Mustafayev yarımfinala və finala yüksəliblər. Yeniyetmələr arasında komanda yarışlarında Fərhad Mustafayev, Ömər Qasımlı, Məhəmməd Həsənli və Əmmar Baxşəliyev, böyüklər arasında isə Maqsud Mahsudov, Hüseyn Abbasov, Əli Nifətəliyev və Mehdi Əliyev uğurlu çıxışları sayəsində finala yüksəliblər.
Böyüklərin komanda hesabında isə komanda 4-cü yerdə qərarlaşıb. Sinxron proqramlarda da gimnastlarımız güclü nəticələr göstərmişlər. Kişilərin yarışlarında Əmmar Baxşəliyev – Fərhad Mustafayev və Maqsud Mahsudov – Hüseyn Abbasov cütləri, həmçinin qarışıq sinxron yarışda Ayan Şabanova və İbrahim Mustafazadə növbəti mərhələyə adlayıb.
Qoşa mini-batutda Əmmar Baxşəliyev, Ömər Qasımlı, Məhəmməd Həsənli və Nikita Koleşnikov komanda hesabında finala yüksəliblər. Əmmar Baxşəliyev də fərdi finalda mübarizə aparacaq. Bu çempionat Azərbaycan gimnastikası tarixində yeni səhifə açır: gimnastlarımız ilk dəfə olaraq həm yeniyetmələr, həm də böyüklər arasında komanda yarışında, eləcə də yeniyetmələr arasında qoşa mini batut hərəkətində finala yüksələ bildilər.
Tamblinqdə də uğurlar davam edir. Mixail Malkin, Tofiq Əliyev, Adil Hacızadə və Aleksey Karataşov komanda finalına yüksəlib. Mixail Malkin və Tofiq Əliyev də fərdi finala yüksəlib.
Final çıxışında komandamız gümüş medala sahib olub. Mənbə: https://www.trend.az/azerbaijan/4173876.html © 2026 Trend İnformasiya Agentliyi.
Xülasə — davamını mənbədə oxuyun.
