Azərbaycan Respublikası Mərkəzi Seçki Komissiyasının sədri Məzahir Pənahovun rəhbərlik etdiyi nümayəndə heyəti Qazaxıstan Respublikasında səfərdə olub. Bu barədə Mərkəzi Seçki Komissiyasının (MSK) mətbuat xidmətindən məlumat verilib. Mərkəzi Seçki Komissiyasından verilən məlumata görə, Qazaxıstan Mərkəzi Seçki Komissiyasının sədri Nurlan Abdirovun dəvəti ilə baş tutan səfərin əsas məqsədi avqustun 23-də həmin ölkədə keçiriləcək növbədənkənar parlament seçkilərini beynəlxalq müşahidəçi qismində müşahidə etməkdir.
Gözlənilir ki, MSK nümayəndələri səsvermə günü ərəfəsində ümumi hazırlıq prosesini və seçki komissiyalarının fəaliyyətini nəzərdən keçirəcək, həmçinin səsvermə günü paytaxt Astanadakı seçki məntəqələrində səsvermə prosesini müşahidə edəcəklər. Nümayəndə heyəti həmçinin Türk Dövlətləri Təşkilatına üzv dövlətlərin Ali Seçki Orqanlarının Məşvərət Platformasının avqustun 22-də Astanada keçiriləcək iclasında iştirak edəcək. İclasın gedişində iştirakçılar seçki administrasiyaları arasında davam edən dialoq və əməkdaşlığın hazırkı vəziyyətini və gələcək istiqamətlərini, seçkilərin idarəedilməsi və digər məsələlərdə qabaqcıl təcrübənin mübadiləsini müzakirə edəcəklər.
Səfər çərçivəsində MSK sədrinin qazaxıstanlı həmkarı, o cümlədən Türk Dövlətləri Təşkilatına üzv dövlətlərin və seçkiləri müşahidə edən beynəlxalq təşkilatların seçki idarəetmə orqanlarının rəhbərləri və digər rəsmi şəxslərlə görüşləri də nəzərdə tutulub. Görüşlərdə qurumlararası əlaqələrin daha da dərinləşdirilməsi perspektivləri, seçkilərlə bağlı müxtəlif sahələrdə əməkdaşlıq üçün yeni imkanlar, qarşılıqlı maraq doğuran məsələlər müzakirə olunacaq. Bu arada MSK nümayəndələri Türk Dövlətləri Təşkilatı, Türk Dövlətləri Parlament Assambleyası, ATƏT/DTİHB və Müstəqil Dövlətlər Birliyinin təşkilatçılığı ilə beynəlxalq müşahidə missiyaları çərçivəsində Qazaxıstan Respublikasında keçirilən növbədənkənar parlament seçkilərini də izləyirlər.
Mənbə: https://www.trend.az/azerbaijan/politics/4216765.html © 2026 Trend İnformasiya Agentliyi.
Xülasə — davamını mənbədə oxuyun.
