Rusiyanın Azərbaycandakı fövqəladə və səlahiyyətli səfiri Mixail Yevdokimov Azərbaycan Xarici İşlər Nazirliyinə çağırılıb. Bu barədə Azərbaycan XİN-in yaydığı məlumatda deyilir. Nazirlikdən verilən məlumata görə, görüşdə Azərbaycan tərəfi son vaxtlar Rusiyanın media və informasiya məkanında Azərbaycana, Azərbaycan xalqına və ölkə rəhbərliyinə qarşı səsləndirilən təxribat xarakterli, təhqiramiz və hədələyici bəyanatlardan ciddi narahatlığını və qəti etirazını Rusiya tərəfinə çatdırıb.
Xüsusilə “Anlaşmanın aydınlığı” layihəsi çərçivəsində 13 avqust 2026-cı il tarixində yayımlanan verilişdə Azərbaycana, xalqına, ölkə rəhbərliyinə qarşı səsləndirilən fikirlərə diqqət çəkilib. Bundan başqa, avqustun 7-də Sputnik radiosunda yayımlanan verilişdə Azərbaycan rəhbərliyinin “Rusiya terrorçu və ekstremistlər siyahısına” salınması, avqustun 9-da “YouTube” platformasında, avqustun 16-da isə “Spas” telekanalında Azərbaycan rəhbərliyinə qarşı təhqiramiz materialların və təxribat xarakterli fikirlərin dəfələrlə yayımlanması ilə bağlı səslənən cəfəngiyyatlar qeyd edilib. İclasda vurğulanıb ki, Azərbaycan dövlətinin daxili siyasi proseslərinə müdaxilə imkanlarının müzakirəsi, Azərbaycan xalqına və Azərbaycan rəhbərliyinə qarşı fiziki zorakılıq çağırışlarının səsləndirilməsi yolverilməzdir.
Görüşdə qeyd olunub ki, Azərbaycanın yuxarıda qeyd olunan fəaliyyətlərin qarşısının alınması ilə bağlı dəfələrlə çağırışlarına və məsələnin müxtəlif siyasi səviyyələrdə müzakirə olunmasına baxmayaraq, oxşar ritorikanın getdikcə daha sərt formada davam etməsi ciddi narahatlıq doğurur. Azərbaycan tərəfi Rusiyanın informasiya və media məkanında Azərbaycana qarşı təxribat, təhdid və zorakılıqdan ibarət ritorikaya son qoymaq üçün qarşı tərəfin təcili və təsirli tədbirlər görəcəyinə dair gözləntilərini bir daha çatdırıb. Mənbə: https://www.trend.az/azerbaijan/politics/4215979.html © 2026 Trend İnformasiya Agentliyi.
Xülasə — davamını mənbədə oxuyun.
