Müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev Pakistan Silahlı Qüvvələrinin Baş Qərargahında Xarici Hərbi Əməkdaşlıq Baş İdarəsinin rəisi general-mayor Məhəmməd İmran Xan Babarın rəhbərlik etdiyi Pakistan İslam Respublikasından olan nümayəndə heyəti ilə görüşüb. Bu barədə Azərbaycan Müdafiə Nazirliyinin mətbuat xidməti məlumat yayıb. Görüşdə general-polkovnik Kərim Vəliyev iki ölkə arasında münasibətlərin dostluq və qardaşlıq münasibətlərinə söykəndiyini qeyd edib və Azərbaycan ilə Pakistan arasında strateji tərəfdaşlıq münasibətlərinin hazırkı durumundan məmnunluğunu bildirib.
Baş Qərargah rəisi qeyd edib ki, iki ölkənin müdafiə qurumlarının yüksək rütbəli rəhbərliyi arasında müntəzəm görüşlər ikitərəfli hərbi əlaqələrə yeni impuls və məzmun əlavə edib. Səmimi qəbula və ona göstərilən qonaqpərvərliyə görə minnətdarlığını bildirən general-mayor Məhəmməd İmran Xan Babar tərəflər arasında müntəzəm keçirilən görüşlərin ölkələrimiz arasında ikitərəfli hərbi əməkdaşlığa müsbət töhfə verdiyini qeyd edib. Görüşdə, həmçinin hərbi təhsil, hərbi-texniki əməkdaşlıq, birgə təlimlər və ümumi maraq doğuran bir sıra digər məsələlər ətrafında ətraflı fikir mübadiləsi aparılıb.
Mənbə: https://www.trend.az/azerbaijan/society/4217923.html © 2026 Trend İnformasiya Agentliyi.
Xülasə — davamını mənbədə oxuyun.
