Azərbaycan Respublikası Mərkəzi Bankı tərəfindən aparılan monitorinqlər müəyyən edib ki, bəzi xarici investisiya platformaları müxtəlif vasitələrlə Azərbaycanda özünü tanıtdırır və ölkə rezidentlərini öz xidmətlərindən istifadə etməyə cəlb edir. Bu barədə Azərbaycan Mərkəzi Bankının mətbuat xidmətinin yaydığı məlumatda deyilir. Bu arada qeyd edilir ki, bu platformaların xidmətləri internet saytları, sosial media, maarifləndirici proqramlar, seminarlar və digər marketinq alətləri vasitəsilə təklif edilir və təbliğ edilir.
Mərkəzi Bank bildirir ki, xarici ölkələrdə tənzimləyici orqanlar tərəfindən verilmiş lisenziyaya malik olmaq platformaya Azərbaycan Respublikasının ərazisində investisiya xidmətləri göstərmək və ya onları təşviq etmək hüququ vermir. Hər hansı investisiya xidmətlərindən istifadə etməzdən əvvəl xidmət provayderinin Azərbaycan Respublikasında fəaliyyət göstərmək üçün müvafiq lisenziyaya malik olduğunu yoxlamaq vacibdir”. İnvestorların hüquqlarını qanunvericiliyə uyğun olaraq qorumaq üçün Mərkəzi Bank vətəndaşlara investisiyalarını yalnız Mərkəzi Bank tərəfindən verilmiş investisiya lisenziyasına malik olan qurumlara həvalə etməyi tövsiyə edir. Mərkəzi Bankdan lisenziya almış investisiya şirkətlərinin siyahısı Mərkəzi Bankın rəsmi internet saytında (https://www.cbar.az/page-200/investment-companies) yerləşdirilib.
Mənbə: https://www.trend.az/business/4216829.html © 2026 Trend İnformasiya Agentliyi.
Xülasə — davamını mənbədə oxuyun.
