Avqustun 27-də Azərbaycan Respublikası xarici işlər nazirinin müavini Yalçın Rəfiyev İslam Əməkdaşlıq Təşkilatının (İƏT) Xarici İşlər Nazirləri Şurasının 23-cü fövqəladə iclasında iştirak edib. İƏT-in Səudiyyə Ərəbistanının Ciddə şəhərindəki mənzil-qərargahında keçirilən fövqəladə iclasın gündəliyinə İƏT-in yeni baş katibinin seçilməsi, həmçinin Fələstin və Qüds Əl-Şəriflə bağlı məsələlər daxil edilib. Tədbirin əvvəlində İKT-nin yeni baş katibinin seçilməsi ilə bağlı müvafiq qərar yekdilliklə qəbul edilib.
Qərara əsasən, bu vəzifəyə yeganə namizəd, Mavritaniya İslam Respublikasının keçmiş xarici işlər naziri İsmayıl Ould Şeyx Əhməd İƏT-in yeni baş katibi seçilib. Yığıncaqda çıxış edən Y.Rəfiyev yeni baş katibi vəzifəyə təyin olunması münasibətilə təbrik edib və fəaliyyəti dövründə Azərbaycan Respublikasının hərtərəfli dəstəyini alacağını bildirib.
Eyni zamanda, İƏT-in baş katibi kimi səlahiyyət müddəti başa çatan Hissein Brahim Taha fəaliyyəti dövründə səmərəli fəaliyyətinə görə təşəkkür edilib. Çıxışda İKT-nin mühüm beynəlxalq təşkilat kimi inkişaf perspektivlərindən, onun qarşısında duran vəzifələrdən bəhs edilib. Nazir müavini Azərbaycanın 2027-ci ildə İƏT-in dövlət və hökumət başçılarının Zirvə toplantısına ev sahibliyi edəcəyini və təşkilata sədrliyi üzərinə götürəcəyini xatırladaraq, ölkənin təşkilatın maraqları və üzv dövlətlər arasında əməkdaşlığın daha da genişləndirilməsi istiqamətində yeni baş katib ilə sıx əməkdaşlıq etmək niyyətində olduğunu diqqətə çatdırıb.
İclasın gündəliyində duran Fələstin məsələsinə gəlincə, Azərbaycanın ardıcıl və prinsipial mövqeyi, beynəlxalq hüququn aliliyinə hörmət edilməsinin vacibliyi, o cümlədən Azərbaycanın Fələstin xalqına, xüsusilə təhsil və səhiyyə sahələrində göstərdiyi yardımlar vurğulanıb. Rəfiyev qeyd edib ki, Fələstinin Baş naziri Məhəmməd Mustafanın bu ilin iyulunda Azərbaycana rəsmi səfəri iki ölkə arasında iqtisadi əməkdaşlığın inkişafı üçün yeni imkanlar açıb. Mənbə: https://www.trend.az/azerbaijan/politics/4218449.html © 2026 Trend İnformasiya Agentliyi.
Xülasə — davamını mənbədə oxuyun.
