Rəqəmsal İnkişaf və Nəqliyyat Nazirliyindən Trend-ə verilən məlumata görə, Azərbaycanın süni intellekt (AI) imkanları Beynəlxalq Nəqliyyat Forumunun (ITF) hesabatında yüksək qiymətləndirilib. Nazirlikdən verilən məlumata görə, ölkənin süni intellekt sahəsində təşəbbüsləri növbəti dəfə beynəlxalq səviyyədə tanınıb. Belə ki, İTF tərəfindən dərc olunan “Bacarıqlar bizi irəli aparır: AI dövründə nəqliyyat işçi qüvvəsinin bacarıqları – xülasə və nəticələr” adlı hesabatda ölkəmizin təcrübəsinə xüsusi yer verilib.
Nazirlik qeyd edib ki, hesabatda süni intellektin tətbiqi fonunda işçi qüvvəsinin bacarıqlarının inkişafına dair siyasət yanaşmaları təhlil edilib və dövlətlər üçün əsas istiqamətlər müəyyən edilib. Bu kontekstdə müsbət nümunə kimi “Azərbaycanın 2025-2028-ci illər üçün süni intellekt strategiyası” göstərilib. Nazirlik qeyd edib ki, Azərbaycanın yanaşması süni intellekti əmək bazarı üçün risk kimi deyil, peşəkar inkişaf üçün yeni imkan kimi təqdim edir.
Strategiya çərçivəsində əhalinin süni intellektlə bağlı məlumatlılığının artırılması və ondan etik və məsuliyyətli istifadənin təşviqi prioritetlər kimi müəyyən edilib. Bu məqsədlə Milli Süni İntellekt Mərkəzinin nəzdində yaradılmış Süni İntellekt Akademiyası vasitəsilə təməl biliklərdən başlayaraq daha dərindən STEM əsaslı təlim proqramları həyata keçirilir. Strategiya müxtəlif dövlət qurumlarında 500 işçinin təlim keçməsini və 3000 süni intellekt mütəxəssisi icmasının formalaşdırılmasını nəzərdə tutur.
Hesabatda ümumilikdə qeyd edilib ki, AI-nın nəqliyyat sektorunda tətbiqi təkcə texnoloji məsələ deyil, həm də bacarıqların inkişafı və əmək bazarının transformasiyası məsələsidir. Bu baxımdan Azərbaycanın yanaşmasının beynəlxalq səviyyədə tanınması ölkənin bu sahədə yürütdüyü siyasətin düzgün yolda olduğunu bir daha təsdiqləyir. Bu, həm də Azərbaycanın süni intellekt, rəqəmsallaşdırma, innovasiya və insan kapitalının inkişafı sahəsində ardıcıl siyasətinin beynəlxalq səviyyədə tanındığını və digər ölkələr üçün nümunə olduğunu göstərir.
Mənbə: https://www.trend.az/azerbaijan/society/4173342.html © 2026 Trend İnformasiya Agentliyi.
Xülasə — davamını mənbədə oxuyun.
