İran iqtisadi perspektivlərinin reallaşması üçün Şanxay Əməkdaşlıq Təşkilatına (ŞƏT) üç aydın təklif irəli sürür. Bu barədə İran Prezidenti Administrasiyasının informasiya portalında İran prezidenti Məsud Pezeşkianın Qırğızıstanın paytaxtı Bişkekdə keçirilən ŞƏT sammitində çıxışına istinadən məlumat verilib. “Birinci təklif milli valyutalardan ödənişlər üçün daha geniş istifadə etmək üçün üzv ölkələr arasında maliyyə və bank əməkdaşlığının gücləndirilməsidir.
Birgə ödəniş mexanizmlərinin yaradılması və maliyyə dəstəyi son nəticədə ŞƏT Bankının yaradılması ilə nəticələnəcək. Bu, üzv ölkələr arasında iqtisadi əməkdaşlıq potensialının artırılması və ticarət zəncirində maneələrin azaldılması üçün effektiv addımdır”, - deyə o qeyd edib. İran prezidenti əlavə edib ki, ikinci təklif ŞƏT-ə üzv ölkələrin ixrac və investisiya sığortası ittifaqının yaradılması məqsədilə ticarət və investisiyalara dəstək institutlarının inkişaf etdirilməsidir.
Ümid olunur ki, bu təklif üzv ölkələrin həmrəyliyi ilə istənilən nəticəni əldə edəcək. Pezeşkian bildirib ki, üzv ölkələrin müxtəlif enerji məhsullarının istehsalı və istehlakında yüksək potensialı nəzərə alınmaqla enerji təhlükəsizliyinin gücləndirilməsi İranın irəli sürdüyü üçüncü təklifdir. Təşkilatın üzvü olan ölkələrin geniş coğrafiyasında enerji istehsalı, nəqli və istehlakı sahəsində sabit nümunə kimi ŞƏT Enerji Konsorsiumunun yaradılması üzv ölkələr üçün müsbət nəticələrlə nəticələnə və təşkilatın dünya enerji bazarında mövqeyini gücləndirə bilər.
Pezeşkianın sözlərinə görə, son illərin təcrübəsi açıq şəkildə göstərir ki, təhlükəsizlik və inkişafı bir-birindən ayırmaq olmaz. ŞƏT həm təhlükəsizlik, həm də iqtisadi aspektlərdə effektiv rol oynaya bilər. Təşkilat daxili ticarətin inkişafı, gömrük fəaliyyətinin sadələşdirilməsi, nəqliyyat dəhlizlərinin inkişafı, limanların və logistika mərkəzlərinin inteqrasiyası, tranzit imkanlarının artırılması, təchizat şəbəkələrinin gücləndirilməsi sahəsində real əməkdaşlığa nail ola bilər.
Mənbə: https://www.trend.az/iran/4219361.html © 2026 Trend İnformasiya Agentliyi.
Xülasə — davamını mənbədə oxuyun.
