Özbəkistan və Azərbaycan qarşıdan gələn yüksək səviyyəli tədbirlərə hazırlıq, habelə ticarət-iqtisadi, investisiya və sənaye əməkdaşlığının genişləndirilməsi məsələlərini müzakirə ediblər. Bu barədə Özbəkistan Xarici İşlər Nazirliyinin mətbuat xidməti məlumat yayıb. Nazirlikdən verilən məlumata görə, müzakirələr Daşkənddə keçirilən siyasi məsləhətləşmələrin sonuncu raundu zamanı baş tutub.
Danışıqlar avqustun 19-da iki ölkənin xarici işlər nazirlərinin müavinləri Bobur Usmanov və Samir Şərifov səviyyəsində keçirilib. Tərəflər strateji tərəfdaşlıq və müttəfiqlik ruhunda Özbəkistan-Azərbaycan münasibətlərinin hazırkı vəziyyətini və inkişaf perspektivlərini, siyasi dialoqun gücləndirilməsi və çoxşaxəli əməkdaşlığın genişləndirilməsi ilə bağlı məsələləri nəzərdən keçiriblər. Qarşıdan gələn yüksək səviyyəli tədbirlərə hazırlıq, ticarət-iqtisadi və investisiya əməkdaşlığının dərinləşdirilməsi, o cümlədən nəqliyyat, logistika, enerji və mədəniyyət sahələrində əməkdaşlığın inkişaf etdirilməsi məsələlərinə xüsusi diqqət yetirilib.
Tərəflər praktiki əməkdaşlığın keyfiyyətcə yeni səviyyəyə qaldırılmasının vacibliyini vurğulayıblar. Bundan əlavə, məsləhətləşmə tərəfləri səhiyyə və mədəniyyət sahələrində əməkdaşlığın intensivləşdirilməsinin zəruriliyini qeyd ediblər. Görüş zamanı tərəflər həmçinin regional və beynəlxalq gündəlikdə duran və qarşılıqlı maraq doğuran aktual məsələlər ətrafında fikir mübadiləsi aparıblar.
Mənbə: https://www.trend.az/azerbaijan/4216379.html © 2026 Trend İnformasiya Agentliyi.
Xülasə — davamını mənbədə oxuyun.
