Azərbaycan Respublikasının Prezidenti İlham Əliyev Özbəkistan Milli İnformasiya Agentliyinə (UzA) müsahibə verib. Bu barədə Azərbaycan prezidentinin mətbuat xidməti məlumat yayıb. — Hörmətli cənab Prezident, Azərbaycan-Özbəkistan münasibətləri son illər dinamik inkişaf edərək ən yüksək səviyyəyə – müttəfiqlik səviyyəsinə yüksəlib.
Bu ölkəyə qarşıdakı dövlət səfəriniz ərəfəsində ikitərəfli münasibətlərin hazırkı vəziyyətini və perspektivlərini necə qiymətləndirirsiniz? — İki qardaş ölkə - Azərbaycan və Özbəkistan arasındakı münasibətlər ortaq tarixə, mədəniyyətə, dilə və mənəvi dəyərlərə, o cümlədən əsrlərdən əsrlərə, nəsildən-nəslə keçən xalqlarımızın birliyinə, həmrəyliyinə və dərin qarşılıqlı rəğbətinə əsaslanır. Bu möhkəm təməl üzərində qurulan dövlətlərarası münasibətlər son illərdə görünməmiş inkişaf mərhələsinə qədəm qoyub, ən yüksək səviyyəyə - müttəfiqlik səviyyəsinə yüksəlib və tamamilə yeni məzmun kəsb edib. Özbəkistan Respublikasının Prezidenti, əziz qardaşım Şavkat Miromonoviç Mirziyoyevlə mənim aramda mövcud olan səmimi dostluq, qarşılıqlı hörmət və etimad Azərbaycan-Özbəkistan qardaşlığının möhkəmlənməsində, dövlətlərarası əlaqələrin bugünkü səviyyəyə çatdırılmasında və müttəfiqliyimizin inkişafında xüsusi rol oynayır.
Prezident Mirziyoyevin ölkələrimiz arasında qardaşlıq, birlik və müttəfiqlik naminə yorulmaz və qətiyyətli səyləri Azərbaycanda ona dərin hörmət və yaxınlıq qazandırıb. Artıq qeyd etdiyim kimi, ölkələrimiz arasında siyasi dialoq çox yüksək səviyyədədir. Təbii ki, son beş ildə ən yüksək səviyyədə - 15 dəfə mütəmadi qarşılıqlı səfərlər və sıx təmaslarımız bu əlaqələrin dinamik inkişafı və möhkəmlənməsi üçün əlverişli şərait yaradır.
Son beş ildə bu, mənim üçüncü dövlət səfərim, ümumilikdə isə qardaş ölkənizə yeddinci səfərim olacaq. Mən həmişə gözəl və bənzərsiz Özbəkistana səfər etməkdən böyük zövq alıram və hər səfər mənim üçün xüsusi əhəmiyyət kəsb edir. Ənənəvi olaraq, bu səfərlər müstəsna qonaqpərvərlik, qardaşlıq, səmimiyyət və qarşılıqlı anlaşma şəraitində keçirilir.
Qardaş Özbəkistanda olarkən məni xüsusilə sevindirən bu ölkənin son illər bütün sahələrdə sürətli inkişafıdır. Müasir şəhərlərin salınması, iqtisadiyyatın şaxələndirilməsi, irimiqyaslı infrastruktur layihələrinin həyata keçirilməsi, elmə, təhsilə, mədəniyyətə və idmana göstərilən diqqət ölkənin sürətli inkişaf tempini əyani şəkildə nümayiş etdirir. Özbəkistanın rəhbəri, əziz qardaşım Şavkat Miromonoviç Mirziyoyevin müdrik rəhbərliyi ilə ardıcıl olaraq ölkənin hərtərəfli inkişafına və çiçəklənməsinə, o cümlədən ölkəmizin beynəlxalq müstəvidə nüfuzunun durmadan möhkəmlənməsinə yönəlmiş genişmiqyaslı fəaliyyətlər və bütün əsas sektorlarda əldə olunan mühüm uğurlar səmimi hörmət və dərin məmnunluq doğurur.
Bütün bunlar düşünülmüş siyasətin, strateji baxışın, Prezidentin Vətən sevgisinin, səmərəli dövlət idarəçiliyinin nəticəsidir. 2024-cü ilin avqustunda mən Özbəkistanda, 2025-ci ilin iyulunda isə Özbəkistan Prezidenti Azərbaycanda dövlət səfərində oldum. Bu qarşılıqlı səfərlər zamanı imzalanmış çoxsaylı sənədlər, xüsusən də “Strateji tərəfdaşlığın daha da möhkəmləndirilməsi haqqında Bəyannamə” və “Müttəfiqlik münasibətləri haqqında Müqavilə” iki müstəqil, güclü və suveren dövlətimiz arasında təbii ittifaqı rəsmi şəkildə təsbit etdi.
Xülasə — davamını mənbədə oxuyun.
