Ukraynanın keçmiş prezidenti Viktor Yuşşenko Azərbaycan Respublikasının Prezidenti İlham Əliyevlə görüşü ilə bağlı paylaşım edib. O, Ukraynaya göstərdiyi dəstəyə görə Prezident İlham Əliyevə və Azərbaycan xalqına minnətdarlığını bildirib. Bu barədə Viktor Yuşşenko öz Facebook səhifəsində məlumat verib.
O, Azərbaycan Respublikasının Prezidenti İlham Əliyevlə şəxsi, səmimi və məzmunlu görüş keçirdiyini bildirib: "Azərbaycan Respublikasının Prezidenti İlham Əliyev ilə şəxsi, səmimi və məzmunlu görüşdən çox məmnun oldum. Ukraynanın Azərbaycandakı səfiri Yuri Hüsyevin iştirakı ilə iki xalqımızın əsl dostu və etibarlı tərəfdaşı kimi fikir mübadiləsi apardıq". Yuşşenko qeyd edib ki, onun Azərbaycanla dostluğunun tarixi 1989-cu ildə Heydər Əliyevlə Naxçıvanda tanış olması və dostluq münasibətləri qurması ilə başlayıb: “Mənim üçün bu dostluğun hekayəsi 1989-cu ildə Naxçıvanda, Heydər Əliyevlə görüşəndən və biz dostlaşandan sonra başlayıb.Prezident İlham Əliyevlə məni şəxsi dostluq birləşdirir. Ukrayna-Azərbaycan münasibətləri”. O, iki ölkə arasında strateji tərəfdaşlığın rəsmi şəkildə qurulmasını bu işin əsas nəticələrindən biri kimi dəyərləndirib: “Bu işin əsas nəticələrindən biri də ölkələrimiz arasında strateji tərəfdaşlığın rəsmi şəkildə qurulması oldu.
2008-ci il mayın 22-də Prezident İlham Əliyevin Kiyevə rəsmi səfəri zamanı biz Ukrayna ilə Azərbaycan Respublikası arasında Dostluq və Strateji Tərəfdaşlıq haqqında Bəyannamə imzaladıq. Bu sənəd ikitərəfli münasibətlərimizin strateji xarakterini müəyyənləşdirdi və onların gələcək inkişafı üçün möhkəm zəmin yaratdı”. Yuşşenkonun sözlərinə görə, görüşdə iki ölkənin gələcəyi, ikitərəfli əməkdaşlığın inkişafı və konkret layihələr müzakirə olunub: “Bugünkü görüşdə ölkələrimizin bu günü və gələcəyi, ikitərəfli əməkdaşlığın inkişafı, eləcə də komandalarımızın üzərində işləməyə davam edəcək konkret layihələri müzakirə etdik”. Ukraynanın sabiq prezidenti Ukraynaya göstərdiyi dəstəyə görə Azərbaycan tərəfinə təşəkkür edib: “Ukraynaya göstərdikləri sarsılmaz dəstəyə, humanitar yardıma, ukraynalı uşaqlara qayğısına, dövlətimizin suverenliyinə və ərazi bütövlüyünə göstərdiyi sarsılmaz hörmətə görə Prezident İlham Əliyevə və Azərbaycan xalqına xüsusi təşəkkürümü bildirmək istəyirəm”. Yuşşenko səfərin təşkilində köməklik göstərən diplomatik nümayəndələrə də minnətdarlığını bildirib.
Xülasə — davamını mənbədə oxuyun.
