Diplomatik korpusun nümayəndələri Xankəndi Dəmir Yolu və Avtovağzal Kompleksində aparılan tikinti işlərinin gedişatı ilə tanış olublar.
APA-nın Qarabağa müxbirinin məlumatına görə, səfərdə görülən işlər və hazırlıq vəziyyəti barədə məlumatlar diplomatiklər tərəfindən yoxlanılıb.
Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov bildirib ki, işğaldan azad edildikdən sonra genişmiqyaslı bərpa-quruculuq işlərinin aparıldığı Xankəndidə Dəmir Yol və Avtovağzal Kompleksinin inşası mühüm layihələrdən biridir.
Onun sözlərinə görə, kompleks bölgədə ictimai nəqliyyatın əlçatanlığını artırmaqla yanaşı, sosial-iqtisadi dirçəlişə və regional əlaqələrinin genişlənməsinə mühüm töhfə verəcək. Bildirilib ki, kompleks, həmçinin ata-baba yurdlarına qayıdan soydaşlarımızın digər şəhər və rayonlara rahat səfər etməsində mühüm rol oynayacaq.
Qeyd edilib ki, ümumilikdə Ağdam-Xankəndi dəmir yolu xətti boyunca Əsgəran və Xocalı stansiyalarının, Xankəndi Dəmir Yolu və Avtovağzal Kompleksinin, eləcə də digər zəruri infrastrukturun tikintisi planlaşdırılır: "Bərdə-Ağdam dəmir yolu xəttinin davamı olan Ağdam-Xankəndi dəmir yolu xəttinin uzunluğu 28 kilometrdir. Layihə üzrə işləri tamamlanıb. Layihənin icrası 2025-2026-cı illəri əhatə edir".
Xüsusi nümayəndə Elçin Yusubov Xankəndidə ictimai nəqliyyat şəbəkəsinin də formalaşdırıldığını diqqətə çatdırıb. Yeni marşrut şəbəkəsi üzrə avtobus xətləri istifadəyə verilib və şəhər sakinləri həmin marşrutlardan rahat şəkildə istifadə edirlər: "Marşrut xətləri boyunca ümumilikdə 62 ünvanda dayanacaq məntəqəsi müəyyənləşdirilib və müvafiq nişanlarla təchiz olunub. Sərnişindaşımalar elektrik avtobusları ilə həyata keçirilir. Xankəndidə əhalinin mövcud tələbatı nəzərə alınaraq ilkin mərhələdə 10 nəqliyyat vasitəsi 14-15 dəqiqəlik aralıqda sərnişinlərə xidmət göstərir. Avtobuslarda ödənişlər həyata keçirilir. Bunun üçün nəqliyyat vasitələrində müvafiq avadanlıqlar qurulmuşdur. Fiziki kartların balansını Xankəndi şəhərində quraşdırılmış ödəniş terminalları vasitəsilə artırmaq mümkündür".
Xülasə — davamını mənbədə oxuyun.
