Könüllülər İngiltərənin ən qədim vərəm xəstəxanalarından birini qazıntılar, orta əsrlərdə xəstəliyin qurbanlarının necə müalicə olunduğunu göstərir

Tədqiqatçılar İngiltərənin ən böyük və ən qədim lepra xəstəxanalarından birinin, cüzam xəstəliyinə yoluxmuş insanlar üçün keçmiş karantin zonasının qalıqlarını qazıb çıxarırlar.

Linkoln şəhərində hazırda otlu park olan ərazidə yerləşən orta əsrlərə aid Müqəddəs Günahsızlar Xəstəxanası (Hospital of the Holy Innocents), Linkoln şəhər şurasının bəyanatına görə, çox güman ki, I Henrinin hakimiyyəti dövründə təsis edilib və təxminən beş əsr fəaliyyət göstərib.

Ötən il 100-dən çox könüllü ərazidə aparılan sınaq qazıntılarında iştirak edib. Anqliya Raskin Universitetinin arxeoloqu Samanta Tipperin rəhbərliyi ilə onlar xəstəxananın sərhəd divarları və bina səthlərinin, eləcə də orta əsrlərə aid artefaktların izlərini aşkar ediblər. Ötən həftəsonu Britaniyanın arxeologiya haqqında “Time Team” televiziya serialının ziyarəti ilə qazıntı işlərinin illərlə davam edəcək genişləndirilməsinə start verilib.

Linkoln şəhər şurasının üzvü Rebekka Lonqbottom bəyanatda deyir: “Ötən ilki ictimai qazıntılar bizə “Common”un altında nələrin gizləndiyinə dair maraqlı bir baxış imkanı verdi və indi biz bu kəşfləri araşdıraraq, Linkoln tarixinin bu vacib hissəsi ilə bağlı insanlar və yerlər haqqında daha çox məlumat əldə edərək bunu bir addım irəliyə apara bilərik”.

XI əsrin sonu və ya XII əsrin əvvəllərindən başlayaraq, *Mycobacterium leprae* bakteriyasının törətdiyi infeksiya olan cüzam xəstəliyinə yoluxduqda, hər dəfə 20-yə qədər insan Müqəddəs Günahsızlar Xəstəxanasına yerləşirdi. Hansen xəstəliyi kimi də tanınan bu xəstəlik dəri, göz və sinirlərə hücum edərək, xaricdən yaralar və ləkələr şəklində özünü büruzə verir.

Cüzam İngiltərədə V əsrdə meydana çıxıb, ehtimal ki, Skandinaviyadan gətirilib və təxminən altı əsr sonra endemik hala çevrilib. Müasir mütəxəssislər bilirlər ki, cüzam əslində çox da yoluxucu deyil, lakin min il əvvəl İngiltərədə bu xəstəlikdən əziyyət çəkənlər ömürlük karantinə alınırdı və “hüquqi cəhətdən ölü” elan edilirdilər. Dünyanın hər yerində cəmiyyətlər cüzamlıları ada koloniyalarına sürgün edirdilər. Bir çox ingilis bu xəstəliyi günahların cəzası hesab edirdi. Tipperin aprel ayında BBC-dən Sara-Mey Buççieri və Skott Daltona dediyi kimi, cüzamlıların “yer üzündə öz cəhənnəmlərini” yaşadıqlarına inanılırdı.