Həyəcanverici, lakin "qəddar" tapıntı: Norveçin sürətlə əriyən dağ buzlağından 5000 illik ox çıxıb

Arxeoloqlar Norveçdə əriyən buzlaqların altından 48 ədəd tarixdən əvvəlki dövrə aid ox aşkar ediblər; bunlardan birinin 5000-6000 il əvvələ aid olduğu təxmin edilir.

Tədqiqatçılar bu kəşfləri Norveçin cənubunda, Oslo şəhərindən təxminən 200 mil məsafədə yerləşən dağlıq bölgə Jotunheimendə keçirilən üç həftəlik ekspedisiya zamanı ediblər.

Son 20 ildir ki, onlar dünyanın ən böyük buzlaq arxeologiyası proqramı olan "Secrets of the Ice" (Buzun sirləri) çərçivəsində bu bölgədə qazıntılar aparırlar.

İndiyədək komanda 73 arxeoloji ərazidən 5000-dən çox artefakt, o cümlədən maral ovu üçün avadanlıqlar, yük atlarının qalıqları, geyim və gündəlik həyata aid digər əşyalar aşkar edib. Innlandet İl Şurası və Oslo Mədəniyyət Tarixi Muzeyinin əməkdaşlığı ilə həyata keçirilən layihə çərçivəsində, həmçinin 3400 illik dəri ayaqqabı və dünyanın ən qədim bütöv taxta xizək cütü tapılıb.

Təbiət qoynunda qalan üzvi materiallar adətən parçalanır. Lakin Anna Fiorentino may ayında "Smithsonian" jurnalı üçün yazdığı məqalədə qeyd edib ki, "buz çürümə prosesini dayandırır". "Taxta və parça kimi üzvi materialları oksigensiz mühitdə sabit, aşağı temperaturda saxlamaqla, buz əşyaları bir neçə ay ərzində məhv edə biləcək mikrob fəaliyyətini ləngidir."

Hətta geyimlər də buzun altında qorunub saxlanılıb. Arxeoloqlar eramızın 300-cü ilinə aid bütöv bir tunika və 1000-ci ilə aid bütöv bir əlcək aşkar ediblər.